1480. Juli 8. Oppeln

In gotis namen Amen. Wir Johannes vnnd Niclass Gebruder von gotis gnadin herczugin ynn Slezien vnnd herrin zcu Oppol Obirste Gloge vnnd Lublin etc. Bekennen vnnd thuen kunth offintlich mit dießem Brieffe allen den die en sehen adir horin leßin. Das vor vnns komen ist die Ersame vnnd toguntliche Jungfraw Katherina yn Jungfer closter zcu Czarnowanst Etwenn Johannis Strol von Pawunkow natürliche tochter, wolgesundt leibis vnnd der vornunfft, mit wolbedochtem mute vnnd vorgehabtin rate irer frundin, mit frolichin antlicze vnnd lachendem munde, vnnd hoth recht vnnd redlichin vffgereicht alle ir vatirlich vnnd mutirlich Erbe teil, was sie hoth adir ymmer an sie komen würde ynn dem gutte vnnd Dorffe Jezowa ynn Lobnischin gebitte gelegin Den Erbirn vnnd woltuchtigin Jan vnnd Petirn Strolin gebrudern Das obgenant gut vnnd Dorff zcu habin haldin vnnd des genissin, domethe zcu thuen vnnd zcu lossin, vorkowffin vorsitczin vorwechsiln vorgebin Empfremden, erplichin vnnd ewiglichin zcu besitczin Vnnd sust gemeynclich an ihren geerbin vnnd rechten nochkomelingm notcz vnnd fromen zcu wendin, Als das Inn allir nöctzlichste wirt geroten, vnd zcu fromen komen mag, Alzo dach Das die obgenante Jungfrawe Katherina sal vnnd mag dasselbe gut vnnd Dorff Jezowa zcu irer lebe tagin haldin vnnd genissin Vnnd noch iren tode hot sie awsgenommen fier marck hallir vnnsir lande werunge Jerlicher czinße die dy gemelten gebrudier vnnd iren nochkomelinge awss dem genantin gutte Jezowa von den fforwerckin scholtczin gebawrn, vnnd awss allin zcugehörungin vnnd genissin wie die genannt seyn adir genant möchtin werdin, nichtis awsgenomen, alle Jor zcu gebin die selbe czinße nemlichin fier marck hallir vnnßir lande werunge vff Sandte Hedwigis tag Vnnd wenne die genante Jungfraw Katherina von gotis vorhengnisse abeginge, Das sulche fier marck hallir czinße folgtin vnnd folgin sullinn Jungfraw Katherine Laskowska vnnd Dorothee Walczerzowska, die denne der mehegenantin czinßen gebrauchin sollin beide zcu irin lebetagin vnnd noch erim tode yn das Closter, Alßo eyne marck zcu der kirchin gerethe, die ander margk zcu der Baw des Closters, vnnd Czwu margk den Jungfern zcu ernn genissen, das sie denne alle vnnd iczliche die inn dem Conuent desselbin genantin Closters seyn werdin, genissin vnnd gebrawchin sollin vnnd mogin, Dach alßo vnnd yn sulchin vndirscheide das die genante Brudir, ire nochkomelinge adir die sulche gut vnnd Dorff in zcukunfftigin czeitin haldin werdin, nw noch zcu ewigin czeitin sulche czinße nymmer abelözin sullin Sundir die gerucklich ane alle hindirniss gebin. Wurde abir zache das sulche obgenante czinße gar adir eyn teil vorhaldin wurdin vnnd nicht gegebin von den genanten Brudern Jan vnnd Petirn Adir von den die sulch genant guth in zcukomfftigen czeitin haldin würdin So sullin wir vnnd vnnßre nochkomende furstin zcu Lublin adir vnnßer anweldir adir amecht lewte alzo vffte die genanten Jungfrawen des begerende seyn werdin, vnnßn pfendir dorczu leyen sullin Dorvmbe zcu pfendin vnnd mit dem pfande thuen noch gewonheit des landis Vnschadlichin vnnßn furstlichin rechtin vnnd diennsten. Mit vrkundt desis briffis bestetiget vorsegelt vnnd eingeweiset mit vnnßn furstlichen angehangenden Ingesegel. Geschan vnnd Gegebin zcu Oppol am Sonnebende vor Sandte Margarethe virginis tag Noch Cristi geburth fierczinhundirth Jar der noch ynn dem achczigstin Jare. Dobey seyn gewest der Edil vnnd die woltuchtigin vnnßre lieben getrawen Jann von Wrben vnßer Marschalk, Jan von Proskaw, Jan Czayka, Mikulass Nawog von Dolno, Jacob von Schilerzowitcz, Jann vonn Rogaw vnnd Cristoff von Tiachowitcz dem deßir briff wart befolinn.

Zwei Wappensiegel in rothem Wachs: s. iohannis. dei. g. ducis. opolien, und s. d. nicolai. d. opol. Auf der Rückseite steht: List odrzeczeny Na Gezowu panny Wklassterze Czrnowuz. Girzik Dziwkowsky.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.